2019-cu ildən ABŞ sanksiyaları altında olan Çin texnologiya nəhəngi Huawei Technologies öz əməliyyat sistemi olan HarmonyOS-i inkişaf etdirmək məcburiyyətində qalıb. Lakin bu sistem Çin xaricində məhdud məşhurluq qazanıb. Buna baxmayaraq, keçən rübdə HarmonyOS Çində iOS-i məşhurluq baxımından geridə qoymağı bacarıb. Bununla belə o hələ də Android-dən geri qalır. South China Morning Post qəzetində Counterpoint Research şirkətinin statistikasına əsaslanan məlumatlara görə 1 il əvvəl HarmonyOS-in Çin bazarındakı payı 16%-dən çox deyildi. 2023-cü ilin dördüncü rübündə isə bu göstərici 19%-ə yüksəlib.

Eyni dövrdə Apple iOS-in bazar payı 20%-dən 17%-ə düşüb. Bu azalma HarmonyOS-in Çində bazar liderliyinə yüksəlməsinə səbəb olub. Bununla yanaşı, Google Android-in mövqeyi ötən il ərzində dəyişməz qalıb və təxminən 64%-lik bazar payını qoruyub. Qlobal bazarda Google Android ötən rübü 74% bazar payı ilə başa vurub, Apple iOS isə 22%-lə ikinci yerdə qərarlaşıb. Çin istehsalı olan HarmonyOS isə 2023-cü il ərzində dünya bazarında cəmi 4%-lik paya malik olub. Keçən il bu əməliyyat sisteminin bazar payı 2%-dən 3%-ə yüksəlib. HarmonyOS-in daha geniş yayılmasını təmin edəcək əsas amillər:

- Huawei-nin yeni buraxılacaq bütün smartfon və planşetlərini HarmonyOS Next ilə təchiz etmək qərarı

- Çində yerli markalara aid mobil cihazların alınmasını stimullaşdırmaq üçün dövlət subsidiyalarının tətbiqi

- Müəyyən qiymət kateqoriyasında alıcılar hökumətdən 69$ qədər kompensasiya ala bilərlər.

HarmonyOS Çində iOS-i geridə qoyub